Դորտմունդի «Բորուսիայի» գործադիր տնօրեն Հանս Յոահիմ Վատցկեն պատասխանել է Մյունխենի «Բավարիայի» կառավարման խորհրդի նախագահ Կարլ Հայնց Ռումենիգեին, հայտնում են գերմանական լրատվամիջոցները:

Ռումենիգեն, մասնավորապես, իր ափսոսանքն էր հայտնել Լևանդովսկու համար: Հայտնի է, որ «Բավարիան» շատ է ցանկանում ձեռք բերել «Բորուսիայի» հարձակվողին, սակայն դորտմունդյան ակումբը հրաժարվել է բաց թողնել ֆուտբոլիստին: Միաժամանակ, «ռուրյան» թիմի ներկայացուցիչները պնդում են, որ «Բավարիայից» ոչ մի գրավոր առաջարկ չեն ստացել:

«Ես, իհարկե, մասնագետ չեմ բորսայի հետ կապված հարցերում, սակայն ճիշտ չէ, որ բարձր մակարդակի ակումբը գրավոր առաջարկ է պահանջում՝ իր բաժնետերերին համապատասխան հայտարարությունն անելու համար: Դա անհրաժեշտ է այն դեպքում, երբ ֆուտբոլիստի տրանսֆերային հարցն արդեն համաձայնեցված է»,-ասել է Ռումենիգեն:

Վատցկեն էլ, իր հերթին, պատասխանել է. «Ռումենիգեն, իսկապես, մասնագետ չէ բորսային հարցերում: Այս փաստն ապացուցում են նրա խոսքերը: Բայց կան որոշակի պարտականություններ, որոնք փաստաթղթեր են պահանջում»,-ասել է Վատցկեն:

armsport.am