Դորտմունդի «Բորուսիայի» մարզչական շտաբը, ղեկավարությունը եւ մարզասերները շատ գոհ են թիմի կազմում Հենրիխ Մխիթարյանի առաջին խաղից: Այս մասին տեղեկացնում է գերմանական ակումբի պաշտոնական կայքը:

Հիշեցնենք, որ Հայաստանի ազգային հավաքականի ֆուտբոլիստը մասնակցեց իր նոր թիմի կազմում շվեյցարական «Բազելի» հետ կայացած հանդիպմանը` դառնալով մեկ գոլի եւ գոլային փոխանցման հեղինակ:

Գերմանացիները հետեւյալ կերպ եմ մեկնաբանել Մխիթարյանի խաղը. «Մխիթարյանն ապացուցեց, որ, իրոք, շատ կարեւոր եւ զորեղ համալրում է լինելու թիմի համար: Նա ավելի քան համոզիչ խաղ ցուցադրեց, եւ թիմի երկրպագուները դրանում համոզվելու առիթ ունեցան»:

Sport1.de կայքը կարճ եւ համառոտ գրում է. «Բորուսիայի» ռեկորդային տրանսֆերի հեղինակը փայլուն խաղ հեղինակեց` նպաստելով իր թիմի հաղթանակին»:

Sportal de. «Հենրիխ Մխիթարյան… Սա այն անունն է, որը «Բորուսիայի» երկրպագուները առաջին անգամ չեն լսում: Հայ ֆուտբոլիստը համոզեց իր խաղով եւ միանգամից հարմարվեց թիմի խաղաոճին»:

Ինչ վերաբերում է «Բորուսիայի» գլխավոր մարզիչ Յուրգեն Կլոպին, ապա վերջինս ասաց. «Նոր թիմ կառուցելու համար այս երեք գոլերն ու հաղթանակը շատ կարեւոր են»:

football365.am